ಒಟಿಟಿಗೆ ಬಂತು ಜಾನಿ ಡೆಪ್ vs ಅಂಬರ್ ಹರ್ಡ್ ಪ್ರಕರಣ: ಡಾಕ್ಯು ಸರಣಿಯ ಟ್ರೈಲರ್ ಬಿಡುಗಡೆ ಮಾಡಿದ ನೆಟ್​ಫ್ಲಿಕ್ಸ್

ಹಾಲಿವುಡ್​ನ (Hollywood) ಖ್ಯಾತ ತಾರಾ ದಂಪತಿ ಆಗಿದ್ದ ಜಾನಿ ಡೆಪ್ (Jhonny Depp) ಹಾಗೂ ಅಂಬರ್ ಹರ್ಡ್​ ಕಿತ್ತಾಟ ಕಳೆದ ವರ್ಷ ಭಾರಿ ದೊಡ್ಡದಾಗಿ ಸದ್ದು ಮಾಡಿತ್ತು. ಯಾವ ಮಟ್ಟಿಗೆಂದರೆ ವಿಶ್ವದ ಹಲವು ಭಾಷೆಗಳಲ್ಲಿ ಇವರ ಸುದ್ದಿಗಳು ಪ್ರಸಾರವಾಗಿದ್ದವು, ಯಾವ ಸಿನಿಮಾ, ಕ್ರಿಕೆಟ್, ಫುಟ್​ಬಾಲ್ ಮ್ಯಾಚ್​ಗಳಿಗೂ ಸಿಗದಷ್ಟು ವೀಕ್ಷಣೆ ನ್ಯಾಯಾಲಯದ ಕಲಾಪಗಳ ಲೈವ್ ಪ್ರಸಾರಕ್ಕೆ ಸಿಕ್ಕಿತ್ತು. ಇವರಿಬ್ಬರ ನ್ಯಾಯಾಲಯದ ವಾದ-ವಿವಾದಗಳ ಲೈವ್ ಕಲಾಪ, ಸಾಕ್ಷಿಧಾರರ ಹೇಳಿಕೆ, ಚಾರ್ಜ್​ ಶೀಟ್, ನ್ಯಾಯಾಲಯದ ತೀರ್ಪುಗಳನ್ನೇ ಆಧರಿಸಿ ನೆಟ್​ಫ್ಲಿಕ್ಸ್ ಡಾಕ್ಯು ಡ್ರಾಮಾ ಬಿಡುಗಡೆ ಮಾಡುತ್ತಿದೆ.

ಜಾನಿ ಡೆಪ್-ಅಂಬರ್ ಹರ್ಡ್​ರ ಜನಪ್ರಿಯ ಕೋರ್ಟ್ ಕಲಾಪದ ಡಾಕ್ಯು ಸರಣಿಯನ್ನು ನೆಟ್​ಫ್ಲಿಕ್ಸ್​ ಬಿಡುಗಡೆ ಮಾಡುತ್ತಿದ್ದು, ಇದೀಗ ಟ್ರೈಲರ್ ಬಿಡುಗಡೆ ಮಾಡಿದೆ. ಇಬ್ಬರ ನಡುವಿನ ಜಗಳವನ್ನು ಬೇರೊಂದು ಕೋನದಿಂದ ನೋಡುವ ಪ್ರಯತ್ನವನ್ನು ನೆಟ್​ಫ್ಲಿಕ್ಸ್ ಮಾಡಿರುವುದು ಡಾಕ್ಯು ಸರಣಿಯ ಟ್ರೈಲರ್​ನಿಂದ ತಿಳಿದು ಬರುತ್ತಿದೆ. ಕೇವಲ ಕೋರ್ಟ್ ಕಲಾಪವನ್ನು ಮಾತ್ರವೇ ಡಾಕ್ಯು ಸರಣಿಯ ವಿಷಯವನ್ನಾಗಿ ಇರಿಸಿಕೊಳ್ಳದೆ ಅದರ ಸುತ್ತ ಬೇರೆ-ಬೇರೆ ವ್ಯಕ್ತಿಗಳು ವ್ಯಕ್ತಪಡಿಸಿದ ಅಭಿಪ್ರಾಯ, ಜನರಲ್ಲಿ ಮೂಡಿದ ಅಭಿಪ್ರಾಯ, ಅದಕ್ಕೆ ಕಾರಣವಾದ ಅಂಶಗಳು, ಜಾನಿ ಡೆಪ್-ಅಂಬರ್​ರ ಪ್ರಕರಣ ಚಳವಳಿಯಾಗಿ ರೂಪುಗೊಂಡ ಬಗೆ ಇನ್ನಿತರೆ ವಿಷಯಗಳನ್ನು ನೆಟ್​ಫ್ಲಿಕ್ಸ್​ನ ಡಾಕ್ಯು ಸರಣಿ ಪರೀಕ್ಷೆಗೆ ಒಳಪಡಿಸಲಿದೆ ಎಂಬುದು ಟ್ರೈಲರ್​ನಿಂದ ತಿಳಿದು ಬರುತ್ತಿದೆ.

ಕಳೆದ ವರ್ಷ ಏಪ್ರಿಲ್ ನಿಂದ ಜೂನ್ ತಿಂಗಳ ವರೆಗೆ ವರ್ಜಿನಿಯಾದ ಕೋರ್ಟ್​ನಲ್ಲಿ ಮಾಜಿ ದಂಪತಿಗಳಾದ ಅಂಬರ್ ಹರ್ಡ್ ಹಾಗೂ ಜಾನಿ ಡೆಪ್​ನ ಪ್ರಕರಣದ ವಿಚಾರಣೆ ನಡೆದಿತ್ತು. ಅಂಬರ್ ಹರ್ಡ್, ಪತ್ರಿಕೆಯೊಂದರಲ್ಲಿ ತಾನು ಜಾನಿ ಡೆಪ್​ನಿಂದ ದೌರ್ಜನ್ಯಕ್ಕೆ ಒಳಗಾಗಿದ್ದೆ ಎಂದು ಬರೆದಿದ್ದರು. ಇದರ ವಿರುದ್ಧ ಜಾನಿ ಡೆಪ್ ಮಾನನಷ್ಟ ಮೊಕದ್ದಮೆ ದಾಖಲಿಸಿದ್ದರು. ಇವರಿಬ್ಬರ ಪ್ರಕರಣದ ವಿಚಾರಣೆಯನ್ನು ಕೋರ್ಟ್​ ಒಳಗಿಂದ ಲೈವ್ ಮಾಡಲಾಗಿತ್ತು. ಈ ಲೈವ್ ವಿಚಾರಣೆಯನ್ನು ವಿಶ್ವದಾದ್ಯಂತ ಕೋಟ್ಯಂತರ ಮಂದಿ ವೀಕ್ಷಿಸಿದರು. ತಮ್ಮದೇ ರೀತಿಯಲ್ಲಿ ವಿಶ್ಲೇಷಿಸಿ ಅಭಿಪ್ರಾಯ ದಾಖಲಿಸಿದ್ದರು.

ಇದನ್ನೂ ಓದಿ:Johnny Depp Amber Heard Case: ಮಾಜಿ ಪತ್ನಿ ವಿರುದ್ಧದ ಕೇಸ್ ಗೆದ್ದು ಸುಮಾರು 116 ಕೋಟಿ ರೂ ಪರಿಹಾರ ಪಡೆದ ಖ್ಯಾತ ನಟ ಜಾನಿ ಡೆಪ್​

ಇಬ್ಬರ ನಡುವಿನ ಪ್ರಕರಣದ ವಿಚಾರಣೆಯ ಸುಮಾರು 200 ಗಂಟೆಗಳ ಫೂಟೇಜ್ ಪ್ರಸಾರವಾಗಿತ್ತು. ಇದನ್ನೇ ಇರಿಸಿಕೊಂಡು ಇದಕ್ಕೆ ಇನ್ನಷ್ಟು ಸೇರಿಸಿ ನೆಟ್​ಫ್ಲಿಕ್ಸ್ ಡಾಕ್ಯು ಸೀರೀಸ್ ತಯಾರಿಸಿದೆ. ಅದನ್ನು ಆಗಸ್ಟ್ 8 ರಂದು ಬಿಡುಗಡೆ ಮಾಡುತ್ತಿದ್ದು, ಇದೀಗ ಟ್ರೈಲರ್ ಬಿಡುಗಡೆ ಮಾಡಿದೆ.

ಜಾನಿ ಡೆಪ್ ಹಾಗೂ ಅಂಬರ್ ಹರ್ಡ್ ಪ್ರಕರಣದಲ್ಲಿ ಅಂತಿಮವಾಗಿ ನಟ ಜಾನಿ ಡೆಪ್​ಗೆ ಗೆಲುವಾಯ್ತು. ಭಾರಿ ಮೊತ್ತದ ನಷ್ಟ ಪರಿಹಾರವನ್ನು ನಟಿ ಅಂಬರ್ ಹರ್ಡ್ ನೀಡಬೇಕಾಗಿ ಬಂತು. ಅಲ್ಲದೆ ಅಂಬರ್ ಹರ್ಡ್ ಹಲವು ಸಿನಿಮಾ ಅವಕಾಶಗಳನ್ನು ಕಳೆದುಕೊಂಡರು. ದೌರ್ಜನ್ಯದ ಆರೋಪ ಹೊತ್ತಿದ್ದ ಜಾನಿ ಡೆಪ್​ಗೆ ಆರೋಪದಿಂದ ಬಿಡುಗಡೆ ದೊರಕಿತು. ಹಾಲಿವುಡ್​ನ ಟಾಪ್ ನಟರಲ್ಲಿ ಒಬ್ಬರೆಂಬ ಖ್ಯಾತಿಯನ್ನು ಡೆಪ್ ಮರಳಿ ಪಡೆದುಕೊಂಡರು. ಆದರೆ ಅವರ ವಿಶ್ವವಿಖ್ಯಾತ ಪಾತ್ರ ಕ್ಯಾಪ್ಟನ್ ಜಾಕ್ ಸ್ಪಾರೋದಿಂದ ಅವರು ಹೊರಗೆ ಬಂದರು. ಆ ಪಾತ್ರವನ್ನು ಇನ್ನು ಮುಂದೆ ಮಾಡುವುದಿಲ್ಲವೆಂದು ಘೋಷಿಸಿದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ